زوجة أشرف شحاتة للسيسى.. انا وولادي مسئوليتك يا كبير دولة القانون والاحتواء

كتب: محمد يونس

زوجة أشرف شحاتة للسيسى.. انا وولادي مسئوليتك يا كبير دولة القانون والاحتواء

زوجة أشرف شحاتة للسيسي:الإعلام حضرتك بيقول علينا ممولين لزعزعة الأمن طيب تصدق اني مش عارفه أدفع مصاريف مدرسة أولادي؟

حضرتك عارف كام أشرف في السجون.. يا ريت بما أنك بتتكلم عن الاحتواء تحتويهم وتعلن مكانهم أو حتى تحاكمهم ياريس

احتواء الشباب مش بالتعيين فى البرلمان ياريس

عارف يا ريس

عارف وجهتلك كام نداء بقالي سنتين

وهافضل أوجهلك لحد ماترد علي لان طول ما حضرتك موضع مسئوليه دا حقي عليك.

عارف أشرف محبوس من غير قضيه في سجون الداخلية ومعه كام واحد همه مسئوليتك ياريس

حضرتك بتقول احتواء شباب 25 يناير هي يناير ثورة ولا لا؟ حضرتك معترف بها وعايز تقعد مع شبابها ومؤيدينك بيشتموا فيها وبيقولوا عملاء وممولين رغم أن حضرتك لك صور مع شبابها إسراء وماهر وغنيم وحضرتك كنت رئيس المخابرات يعني رجال الوطنيه والأمن مع أجدع شباب في البلد.

أحد مؤيدينك قال باللفظ اللي هايقول يناير ثورة هاضربه بالجزمة رغم ان يناير في دستور الحكومة ثورة.

طيب حضرتك عارف هاتحتوي الشباب ازاي مش بالتعيين في البرلمان أو مشاريع رغم اننا مانعرفش مين شباب يناير اللي بتقعدوا معهم أصلا بس الاحتواء إن السجون تكون آدمية حتي للمحكوم عليهم بالإعدام .

عارف حضرتك الشتاء والسقعه دي واحنا في بيوتنا بدفاياتنا وبالبطاطين وفي السجون الله أعلم بحالهم يا عندهم بطاطين ولا لأ؟

وعارف ان واحد زي أشرف مقبوض عليه ومرمي في السجن ومركون لما ييجي علي بال البيه والباشا اللي قابض عليه لصالح أقارب أحد الوزراء يوم ما يفتكره ممكن يلبسه أجدع قضيه وعارف عنده غطا في البرد ده ولا لا ؟

عارف حضرتك يعني ايه احتواء يعني المفروض أشرف واللي زيه يتقدم للمحاكمه لو قيد تحقيق بس هو أصلا سيادتك عارف أشرف عندكم من امتي؟ من سنتين ياريس.. وغيره كتير هاتحتوي مين ولا مين سعادتك دا احنا كتير قوي.

طيب بما ان حضرتك بتقول احتواء ياريت تحتوي ولادي وتقولهم أبوهم فين ومقبوض عليه ليه؟

طيب اقولك مفاجأه

تعرف أن أشرف قبل مايخرج لبس واتشيك وقالي رايح أشرب القهوه في مكتب أمن الدوله يعني استدرجوه هناك وأنكروا وجوده

طيب حضرتك تعرف ان جالي تهديدات ما افتحش الموضوع ده بس خلاص هايجرالي إيه اكتر من الوجع والمرار اللي أنا فيه, هاتحتويني بولادي امتي ياريس وتكشفوا عن مكان أشرف؟

عارف حضرتك ان واحد زي اسلام خليل شاب اختفي لمدة 122 يوم وطلعت الداخليه كدبت ونفت وجوده تماما وبعدها أهله عرفوا انه بيتحقق معاه؟

هو حضرتك عارف فيه كام اشرف واسلام في السجون عندهم قضايا والله حاكموهم ياريس

حضرتك الاعلام بيقول علينا ممولين لزعزعة الأمن طيب تصدق اني مش عارفه أدفع مصاريف مدرسة ولادي؟ انا وولادي مسئوليتك يا كبير الدوله المصريه دولة القانون والاحتواء.

قابلني ياريس وأنا أحكيلك عن حاجات كتير جايز ماتعرفهاش ماهو برضه اللي بيعمل غلط مش هاييجي يقولك غير كله تمام، والأمن مستتب هو هايغلط نفسه ورجالته ؟

أشرف شحاته في أمن الدولة ياريس

احتوي أشرف وأكشفوا مكانه وقدموه للمحاكمة إن كان غلطان.

إمضاء: مها مكاوي .. زوجة أشرف شحاتة المختفي قسريا منذ عامين

 

رابط مختصر

اتـرك تـعـلـيـق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة شبكة موج الإخبارية الالكترونية وهي تلزم بمضمونها كاتبها حصرياً.