اوعى تقول للريس

كتب: محمد يونس

اوعى تقول للريس

لست من هواة سماع خطابات وأحاديث الرئيس والمسئولين فى مصر، وده مش بسبب ان مبحبهمش لقدر الله، ولا لانِ شايف انهم بيقوله اى كلام حاشى لله، لكن فى النهاية كلامهم بيوصلى والحمد لله، ولأهمية دور المسئولين المصريين في إضحاك الشعب المصري، ومتابعة للمسيرة الغرائبية لتصريحاتهم، فمن الممكن أن نستعرض معاً أغرب التصريحات التي أطلقها المسئولون المصريون في الفترات الأخيرة، لكن مربط الفرس هنا فى كل التصريحات ازاى ومنين!! اللى كررها الرئيس فى معظم خطاباته وأحاديثه للشعب المصري، وادعائه المعرفة المطلقة عن كل شئ يدور فى البلاد، انا ممكن كلامى يكون تقيل وسخيف، بس فى الواقع هو حقيقة يعلمها الجميع إلا رئيس وحكومة ازاى ومنين.

لما يطلع علينا مسئول يقول  مستشفيات مصر أفضل من مستشفيات بريطانيا، ومسئول يقول مفيش دولة فى العالم تذكرة المترو فيها بجنيه، ويطلع مسئول يقول مفيش دولة فى العالم بتقدم منظومة الدعم بالشكل ده غير فى مصر، ومسئول أخر يصرح أن بعض دول العالم تلقى بالفوسفات فى المياه لفوائده، وأخر تلك التصريحات التى تعبر عن واقع مصر المرير فى إختيارها لتلك المسئولين كان لوزير الشباب والرياضة المهندس خالد عبد العزيز عندما قال، كنت طالب فاشل وبقيت وزير، وفى الاخر الرئيس يقول بكره تشوفوا مصر، ياراجل ازاى ومنين!!.

مش هاتكلم عن الغلاء والبلاء والابتلاء اللى عايشه المواطن المصرى، لأن هذا أصبح فرض عين على كل من يعيش على أرض المحروسة، دعونا من كل هذه التفاهات وتعالوا نشوف المسئولين اللى حاطين دايماً  مصر فى مقارنة بدول العالم الثالث مثل بريطانيا وأمريكا والهند وماليزيا واليابان الدول اللى مش عارفة لحد النهاردة توصل لسر الخلطة المصرية السرية فى تقليب جيوب المصريين من غير مايحسوا ولا من شاف ولا من درى.

تعالى ياعم نتعرف على أولى خطوات الوصفة السحرية، امسك ياعم الحاج انت وهو ورقة وقلم وركزوا معايا، هتجيب فاتورة الكهربه هتلاقى فيها بند بخط صغير كده على ايدك الشمال اسمه أقساط وتسويات، بقالنا أكتر من 30 سنة بنقسط ونسوى أيه مش عارف ده إحنا لو واخدين فيلا فى مارينا كان زمان أقساطها خلصت من 10 سنين تقريباً، اسمعنى ياريس الحتة دى مهمة أوى وممكن حضرتك تكون مش واخد بالك منها علشان أكيد مش بيجيلك فاتورة كهربة أصلاً، لما بتروح تتعاقد مع شركة الكهربة على عداد بيطلبوا من حضرتك جواب إفادة من الحى اللى انت تابع ليه، طبعاً سيادتك بتروح الحى بتقابل موظف لطيف جداا من بتوع شخلل يافندم، وبعد ما بتخلص كل الشخاليل بترجع تانى الكهربة علشان تقدم الشخاليل عفواً أقصد طلب الإفادة، بينزل لحضرتك معاينة من الشركة لتقدير رسوم المقايسة بتاعت العداد، بعدين ياسيدى بتروح الشركة تانى علشان تدفع رسوم المقايسة والعداد، وانتهت قصة العداد بكثير من المشواير والشخاليل دون أقساط أو تسويات، ومع أول فاتورة كهربة هتلاقى بند أقساط وتسويات موجود جوه الفاتورة بتاع أيه وليه مش عارفين، طيب هل الفلوس دى بتحصلها الدولة من أجل تحسين الخدمات للمواطنين جايز، وفى الأخر الرئيس يطلع يقول عاوز خدمة أدفع، كلنا بندفع من 30 سنة حاجة مش عارفنها ياريس، وده كانت أول وصفة فى الخلطة السرية المصرية لتفتيش جيوب المصريين.

استنى انت رايح فين خليك فى فاتورة الكهربة هتلاقى جنب بند أقساط وتسويات بند أخر اسمه رسوم النظافة بتتحصل منك كل شهر مرتين مرة لشركة الكهربة والأخرى لعامل النظافة الخاص بعمارة سيادتك يافندم ولا من شاف ولا من درى، اقفل بقى على الموضوع ده واوعى تقول للريس.

تانى خطوات الوصفة السحرية هى فاتورة الغاز الطبيعى نفس البند ونفس الأقساط والتسويات، حاولت تروح شركة الغاز وتطلب منهم انك تدفع الأقساط كلها مرة واحدة وتخلص منها، هتقولى أقساط أيه، هقولك اللى حضرتك متعرفش عنها حاجة بس الحكومة بتاعتنا عارفة كل حاجة، وأكيد حضرتك مش هتعرف أكتر من الحكومة.

البند الثالث فى الوصفة السحرية هنا مختلف شويتين، هو حضرتك عندك عداد مايه هتقولى ايون طيب حضرتك شوفت حد من الشركة بيجي يقرأ العداد هتقولى لأ، هنا هقولك بقى الفولة اللى حضرتك متعرفهاش، هى ان معظم عدادات المايه الموجودة عندنا مش شغالة أصلا، هتقولى والمسئولين عارفين ده، طبعاً عارفين، بس هما معندهمش وقت يصلحوا عدادات او يغيروها، ففكروا خارج الصندوق، عاملوا ايه هاقولك ياسيدى، اصبر عليا شوية، الخطوة الأولى بدأو يشوفوا العمارة اللى حضرتك ساكن فيها فى منطقة راقية ولا نصف راقية ولا منطقة شعبية ولا عشوائيات، الخطوة التانية عدد الشقق اللى فى العمارة كام، الخطوة التالتة بيقعد المحصل مع المدير فى الشركة ويقوله يافندم العمارة الفلانية ساكن فيها ناس رايقين، يقوم المدير خابط تقدير الناس الرايقين، 7000 جنيه، والعمارة الفلانية يافندم فيها 5 ماوتير مايه،  8000 جنيه، والعمارة الفلانية حضرتك الناس اللى فيها غلابة أوي يافندم، 700 جنيه، وملكش مكافأت ولا حوافز يانجم الشهر ده ولا اللى بعده، يعنى تقدير فواتير المايه عشوائى يافندم وعلى حسب هوا المحصل والمدير والمكافأت والحوافز والحاجات الحلوة يافندم.

طيب عشان منطولش عليكم فى الوصفات السحرية السرية المصرية لأنها أكثر من زبد البحر، السؤال هنا لما دولة بمؤسساتها ومدخراتها وقناة سويسها ونيلها العظيم وسياحتها الجبارة وتفتيش جيوب المواطنين، كل ده ورئيسها بيقول ازى ومنين!!، طيب المواطن اللى معندوش غير مرتبه الـ 1200 جنيه وعايش فى المزرطة دى كلها يقول أيه،

حسبى الله ونعم الوكيل، ازاى ومنين!!  

انا عارف ياريس إنك مش عارف قولت انورك       

 

رابط مختصر

اتـرك تـعـلـيـق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة شبكة موج الإخبارية الالكترونية وهي تلزم بمضمونها كاتبها حصرياً.